7/09/2008

مش فاهم .. يعني إيه نكون سوا ؛ و فجأة ما نعرفش نتواصل أبداً .. لا صوت و لا صورة .. يعني إيه يكون موجود قدامي ؛ و فجأة ينتهي ..
هل ده معناه إن الجسد مش أنا ..

افتكرت موضوع الاهتمام بالجسد و التعبير عنه خصوصاً في الأدب اللي بيقولوا عليه نسوي .. يعني إزاي نهتم بالتعرف على جسدنا و إزاي نتعامل معاه و نتواصل وياه .. يا سلام .. طب ليه أساساً ؟ مادام في لحظة بيكون الجسد مالوش أي لازمة .. يعني الشيء _ اللي مش عارف كنهه _ اللي اسمه : الموت بينهي أي فايدة أو شعور أو تواصل للجسد .. اللي بيموت بيبطل تنفس .. بيبطل أكل و شرب ؛ بيبطل شعور .. مش بيسمعني و لا بسمعه .. مش بيمارس أي شيء .. بس في جزء موجود و راح في حتة تانية .. اللي هو الروح .. راح فين بقى ؟ مش عارفين ..
راح ازاي ؟ مش فاهمين .. طيب ايه بقى ..

كل اما تحصل حادثة موت لحد قريب مني بتلبسني حالة غباوة على تبلد على اذمهلال .. هو فيه ايه ؟
طيب ايه لازمة الخناق بقى على اي شيء ؟ ما هو انا هنتهي في اي لحظة .. مش فاهم حاجة بجد .. و مش هفهم .. مش باين اني هفهم ..

وابن اللذين مهما انتظرته و توقعته لازم يفاجئ الواحد .. بيجي من حتت غريبة ؛ و في أوقات مش عارف .. مش فاهم فعلاً ..
هتجنن ..

يعني في لحظة ممكن الاقي نفسي مش موجود .. واحد عمال يقلب فيا و يحميني كويس .. و يلفوني في قماشة بيضه ..ما انا مش بتنفس فمش هحتاج مناخيري .. و يحطوني فين ؟
في الطينة .. تراب .. تحت الارض .. طيب ايه بقى ؟

يعني احنا بنعمل ايه ؟ بنهبب ايه بقى ؟ مش عايز حاجة بقى .. مش عايز ابقى هنا .. و مش عايز اروح حتة مش عارفها .. طيب انا اخترت امتى الحياة دي اصلاً .. لا اخترت و لا نيلت ..
اوفففففففففففففففففففففففففففففففففففففف

هناك تعليقان (2):

هويدا صالح / عشق البنات يقول...

مش فاهمة ليه بتدخل في المنطقة النسوية
ما تتحدث عن جسدك الحاضر المغيب بيعد عننا
ولا عاوز الست جوليا كريستيفا تزعل منك
ولا فرجينيا وولف تصحو من غرقها وتلقيك بما في جيوبها من حجرات تثقلها ؟
صباحك فل

حداويت يقول...

صباح الفل يا هويدا ..
ليه بدخل في المنطقة النسوية ؟ سؤال وجيه .. بس إجابيته أوضح من إني أقولها ..
صباح الهنا ..