2/18/2009

انتي بتشتغلي إيه ؟؟ أنا مدون يا خانوم ..

الموضوع ده عما أتفرج عليه من يوم ما اتعرفت على المدونات .. من بعد المدونات انتشرت .. بعد ما الناس اتعاملت معاها كمُسّلمه من مسلمات حياة المصريين زي المدرسة و الأمن المركزي و حسني مبارك و كل ما تراه لن ينتهي أبداً ...

المهم ...

كنت شايف و لسه شايف إن الموضوع مجرد تنفيسه من شخص ؛ و جرنال من شخص تاني ؛ و مجموعة قصصية لواحد تالت و هكذا ..

إنما يا أخويا ألاقي ناس كتير عمالين يقولوا : "فلان المدون " أو بما إنه مدون " و كده يعني .. على أساس إن مدون دي شغلانة و التدوين ده عمل محترف بنمارسه بشكل منظم و يترتب عليه حصولنا على دخل ما ...
هو ليه كده ؟؟
ليه كل حاجة بسيطة جميلة لازم نخرب دين أبوها و نحملها كلام غريب ...

التدوين كتابة .. بس مش ع الورق ... كتابة في الغالب مش بيكون القاريء الوحيد لها هو الكاتب .. بس .. يعني كل واحد فينا لمّا كان حد يسأله بتشتغل إيه ؛ يرد يقول إنه بيكتب خواطر أو إنه شاعر أو قاص أو راجل له رأي في المجتمع ؟؟!! هي دي شغلانة ؟