٦/١٥/٢٠٠٨

عايز إيه ؟

السؤال ده لو ما جاش على بال الواحد مننا كل فترة يبقى الواحد ده مش طبيعي .. مش إنسان أساساً ... ما هو الواحد لو ماعرفش عايز إيه في كل حاجة و كل وقت و في المدى القريب و المدى البعيد ... لو ما عرفش و ماحاولش يعرف كمان يبقى عدم اللامؤاخذة ده مجرد سفيه يجوز الحجر عليه قانوناً .. أي نعم .. زي حالاتي كده ...

يعني أنا الوقتي مش عارف عايز إيه في مواقف معينة .. و مش عارف عايز إيه في الحياة بشكل عام .. كمان مش عارف عايز إيه من أشخاص معينة ..

مش بقول إني مش عايز حاجة .. أنا بقول إني عايز حاجة مش عارفها أو مش عارف إني عايزها ..
حاولت أعرف .. بس المشكلة إني ملول .. يعني بزهق بسرعة قوي .. بهبط .. علشان كده .. حالياً أنا عايش في دور المأنتخ دماغه المستعد لقبول الحجر عليه كي يريح و يستريح ..



هناك تعليقان (٢):

بنوتة مصرية يقول...

أنا شخصيا عايزة اقعد في البلكونة واستمتع بنسمة الصبح المعدة دلوقتي من ورا شباكي
نفسي موت
بس مدونتك شدتني فحرمتني منها
صباح الفل

حداويت يقول...

صباح الياسمين و النرجس ...
كوني حرمتك من نسمة الصبح المعدية جنب شباكك يبقى أستاهل الضرب فعلاً .. شكراً جداً على تعليقك ع المدونة .. نورتيني ..